È po marchjà, L’immenza verità, Circinellu, Scrivu à tè, L’altu silenziu… Pudariami cuntinuà duranti un bellu pezzu u listinu di i canzoni famosi di i Voci di a Gravona chì ani stampatu i menti pupulari. È mentri ch’ellu si compii pianament’è bè u 2023, u gruppu hà da fistighjà di dicembri i so 40 anni. Ci voli à dì ch’elli sò sfilati i dicennii dipoi quillu ghjornu di u 1983 induv’ellu hè nata issa bella mossa iniziata da attori culturali com’è u povaru Paulu Zarzelli, Ghjuvan Micheli Weber, Federicu Armani, Dumè Barrazza, Saveriu Bisgambiglia, Jean-Michel Fortuné è tant’altri. Un associu chì t’avia com’è scopu principali d’animà a valli di a Gravona, fendu campà a cultura tuttu l’annu, soprattuttu d’inguernu, è cantendu i messi. I più anziani s’arricurdarani di quilli ripitizioni in una casa di vinti metri quadrati in Acqualonga ; tempi è tempi… Una squadra chì hè stata aiutata à principiu da un certu Natale Luciani, unu di i fundatori di Canta u Populu Corsu, chì avia « rigalatu » unu di i pezzi maestri di i Voci di a Gravona, Quand’eddi m’accurdarani. Un titulu chì era statu scrittu à principiu pà Canta, ma cù parolli chì aviani scumudatu à certi. Un altru pilastru di a cultura corsa hà porsu una manu à issi ghjuvanotti di tandu, u musicanti Christophe Mac Daniel. Cù u matiriali di u so gruppu, avia sunurizatu i primi sirati di i Voci in Bastia duranti l’inguernu 1983. Stondi è ricordi beati. Hè dinò in issa listessa cità chì u famosu dischettu Spaventu sarà arrisghjistratu à a listessa epica, cù a ghjunta di membri novi com’è Antoine Paoletti, mentri chì nimu in Aiacciu ùn vulia fà entra issa squadra quì in un studiò. Un’amarezza chì hà da svaniscia incù u tempu, mandata à caternu da u successu di i sirati militanti quì è culà. L’anni passendu, i pass’è vena ani da cuntinuà inde l’ambiu di i Voci, è ghjunghjarà frà altru un certu Antoine Tramini, cantadori è musicanti di talentu, pà purtà, com’è parechji altri dinò, a so petra à quill’edifiziu tamantu. È in u 1995, isciarà u dischettu Terra cù nantu ghjuvelli favulosi com’è Sucetà, Novi di maghju, I me rimi è a to chitarra o Puesia. Dopu à parechji anni di silenziu, una squadra nova nova di ghjovani hà ripigliatu u gruppu è l’associu inde a siconda parti di u dicenniu 2010. Hè ella chì hà fattu sorta, dui anni fà, un album ineditu di criazioni.
Una rileva chì, cù rispunsabilità è rispettu, manteni l’eredità di l’opara di i membri fundatori.
D’altrondi, l’associu s’impegna sempri pà a ghjuventù gravuninca, incù una scola in Auccià induva cantadori è musicanti di i Voci intarvenini pà l’amparera di i canti sacri è tradiziunali, ma ancu di u viulinu. In quantu à l’anniversariu di i 40 anni, duvariami campà belli mumenti di festa è d’incantu duranti dui cuncerti chì s’avvicinani. U prima sarà urganizatu u vennari l’8 di dicembri in Aiacciu à u Palatinu è u sicondu u marcuri u 20 di dicembri in Bastia à u Centru culturali L’Alb’Oru. Cù u spiritu d’amicizia è di spartera chì a caratterizeghja, a furmazioni musi-
cali hà dicisu d’invità anziani attori di i Voci di l’anni ottanta è novanta, ma dinò altri gruppi pà cullà nant’à a scena à fiancu à ella, ch’elli sighini quilli chì sò stati attori maiò di u Riacquistu o chì raprisentani a leva nova di u cantu corsu. In a Cità impiriali, u publicu pudarà sciaccamanà à Canta u Populu Corsu, L’Arcusgi, Surghjenti è Cuscenza, mentri ch’elli sarani prisenti in Bastia torna L’Arcusgi eppo I Chjami Aghjalesi, L’Albinu è Una Fiara Nova. Ci sarà dinò una dimensioni sulidaria duranti sti dui sirati, cù a brama di metta in valori associ chì s’impegnani assai nant’à u tarrenu. Pà u cuncertu d’Aiacciu, tutti i soldi racolti grazia à a vendita di biumi è di u magnà andarani à l’associu Inseme, chì aiuta tuttu l’annu famigli corsi chì devini parta in cuntinenti pà fassi curà. Pà contu soiu, A Salvezza tinarà un bancu pà venda ughjetti sfarenti pà finanzià i so azzioni contr’à a miseria suciali nant’à a nostra isula. Infini, una parti di a ricetta di l’intrati di a sirata sarà virsata à l’associu Sulidarità, chì dà dipoi tant’anni una manu à i prighjuneri pulitichi è i so famigli. U listessu dispusitivu sulidariu sarà missu in piazza pà l’evenimentu bastiacciu à prò di l’associu La Marie-Do, chì lotta contr’à u cancaru. I biglietti sò dighjà in vendita nant’à u
situ www.corsebillet.co (ANTU CASANOVA)
Le 8 décembre au Palatinu à 20h30
- Canta u populu corsu
- Arcusgi
- Surghjenti
- Cuscenza
- Les anciens membres des Voci
Sont également associés à cette soirée des associations caritatives telles que : l'association INSEME, l'association A Salvezza et l'associu Sulidarità.
Le 20 décembre au centre culturel l'Alb’oru à 20h30
- I Chjami Aghjalesi
- L'Arcusgi
- L'Albinu
- Una fiara Nova
L'association la Marie Do mettra un stand pour vendre leurs objets et nous allons leur reverser une partie des entrées.
