Care cunsigliere, cari cunsiglieri,  
Ci ritruvemu oghje in una situazione particulare, da luntanu, per una sessione numerica. Simu forse a prima Assemblea à addunisce si di tale manera.  
Prima di tuttu, vuleria chè no pensessimu à e 62 personne chì anu persu a vita in Corsica per via di u Covid-19 è à e so famiglie. Dipoi a nostra ultima sessione, avemu persu dinù trè anziani cunsiglieri di a nostra Assemblea. Vogliu parlà di Lucianu Felli, di Nicolas Alfonsi è di Paul Natali. Vi prupongu chè no li rendessimu l’umaghju publicu ch’elli si meritanu quand’è no turneremu à addunisce ci inseme.  
Eppò, vuleria ringrazià i persunali di l’uspidali, di l’EHPAD, tutti i quelli chì cuntinueghjanu  à travaglià malgratu e cundizione difficiule è i risichi. Casciaghje, fattori, traspurtori, agricultori è piscadori chì permettenu di mantene a vita. Vogliu ringrazià dinù i servizii di a cullettività ch’anu permessu una cuntinuità di l’azzione publica, cum’è per indettu, l’urganisazione di sta sessione.  
U nostru paese, quale hè chì l’averia criduta, hè diventatu un locu periculosu per i nostri anziani. Puru s’è l’epidemia tocca tutta a pupulazione, sò quantu ella hè stata dura per e famiglia di stà luntanu da i soi.  
Li vogliu dì chì per contu nostru, s’è ùn avemu micca tutti i puteri, avemu circatu à parà li da u periculu, da tantu chè l’avemu pussuta fà. Aviamu dumandatu l’interuzzione di i trasporti è a chjusura di e scole, u rinviu di l’elezzione municipale, a generalisazione di i testi, a sperimentazione d’un trattamentu assuciendu l’idrossiclorocchina cù l’azitromissina. U 27 di marzu scorsu, aghju presentatu un raportu sanitariu « Luttà contr’à u Covid-19 » in cunferenza di i presidenti cù una lista di pruposte da mette in ballu subbitu subbitu. Cù u fondu Corsica sulidaria, è u sustegnu di più d’800 dunatori, avemu accoltu più di 100 000€ per attrazzà EHPAD è uspidali. 
 
« Peste è guerre trovanu sempre a ghjente spruvista » scrivia Camus. Dipoi 20 anni è più, e pulitiche sanitarie anu dinù addebbulitu e strutture di salute. Cù una pupulazione anziana, un numeru impurtante di ghjente in ALD, più di 30 000, senza CHU, pochi letti di reanimazione, ci simu trovi più spruvisti chè d’altri, ma forse più sulidarii dinù cù un rispettu strettu di u cunfinamentu, cù azzione di sulidarità, cù creazione di mascare in i nostri paesi. Senza trumbette nè tamburi, avemu vistu i Corsi fà u so « mistieru d’omu ». Anu capitu ch’ùn si pudia aspettà, ch’ùn si pudia barattà cù sta pesta. Puru s’è cunniscimu sempre pocu u Covid-19, anu pigliatu e cose à u seriu, « cù u curagiu di i so sintimi », senza circà à accuncià si cù a malatia. À l’acconciu cecu, anu preferitu a lotta in l’associu, mettendu si inseme per luttà è per vince inseme.  
Puru s’è u Presidente di a Republica hà parlatu d’un scunfinamentu per l’11 di maghju, per contu nostru, pensemu chì l’affari ùn sò daretu à noi. Cù tutti i sacrifizii ch’avemu fattu, ùn pudemu micca piglià u risicu d’un scunfinamentu senza mascare è prutezzione per tutti è senza testi. A messa in ballu di misure sanitarie forte, cum’ella si vede in d’altri paesi aurupei isulani menu tocchi chè noi, cum’è per esempiu Malta, cù solu 3 morti o l’Islanda, cù 10 morti, hè una prumessa di riescita è d’avvene novu.  
Durante tutta a nostra storia, l’isulanità ci hè stata presentata cum’è una debbulezza. Ne pudemu fà una forza, avà chè no simu à scumbatte contr’à sta malatia è dopu dinù, quandu ella venerà l’ora di a ricustruzzione, a nostra sfida nova, per turnà à avè a vita davanti à noi.