Care culleghe, cari culleghi, 

À sente à l’ultime dichjarazione, a riduzzione di tutte l’inugualità seria diventata a prima priurità di u guvernu francese : inugualità di pettu à a salute, cum’è inugualità di pettu à l’educazione. Serebbe quessa a mutivazione di quelli chì cercanu à fà riapre e scole à tutti i patti. Dicenu chì a ripresa di a scola permetterà à i zitelli chì cunoscenu guai suciali di ritruvà una vita più linda. Siccome ci serebbe d’una parte quelli bravi chì volenu apre e scole per aiutà i zitelli in dificultà suciale è sculare, è di l’altra parte, quelli chì serianu senza riguardu per i zitelli è per a so educazione, riguardu à u so campà famigliale. 

A situazione mi pare esse bella sfarente è bella più chjara. 

Per contu meiu, leghju è sentu i studii scentifichi internaziunali, i scentifichi corsi è ancu u cunsigliu scentificu stallatu da Emmanuel Macron, i merri corsi, i trè centu merri parigini, i sindicati d’insignamentu, i parenti d’elevi, chì dumandanu tutti tutti, u riportu di a rientrata à u mese di sittembre.

Per contu meiu, guardu in Auropa. Guardu i paesi chì anu ripurtatu a rientrata à u mese di sittembre, cum’è l’Italia o a Spagna. D’altri paesi anu sceltu di principià a riapertura di i stabbilimenti in direzzione di i più maiò, quelli capaci à rispettà i gesti di prutezzione. Di i paesi in giru à noi, a Francia hè u solu paese à riapre e scole l’11 di maghju per i più chjuchi.

Incù sta decisione sgalabata, per ùn dì di più, serebbenu l’elevi, cù i so prufessori è i so parenti, à esse sposti in prima ligna per i risichi di cuntaminazione dopu u scunfinamentu.

Chjode e scole, ùn vole dì abbandunà i zitelli. Ci sò d’altre attività di piena natura chè no li puderebbemu prupone, cù sughjorni in muntagna o à u mare, cù accumpagnatori, dopu un depistagiu di tutti. E suluzione e pudemu truvà. Ci tocca à truvà le seguitendu scopi sanitarii è pedagogichi, per campà, per ingrandà è per vince l’epidemia. 

A quistione di a respusabilità si pone à noi tutti quant’è no simu. 

A rientrata, puru ristretta, ripresenta un periculu. Senza ghjochi nè libri, ripresenta un ingannu. Ùn vulemu più sente ch’ùn simu micca ubligati à seguità. Ùn vulemu più rivede u filmu di u primu giru di l’elezzione municipale. Ùn puderemu micca dì ch’ùn la sapiamu micca.  

Capiscu i risichi ecunomichi mintuvati da u Primu ministru, ma chì ci serebbe di peghju per un paese chè d’abbandunà a so giuventù à risichi sragiunati identificati, ducumentati, pruvati da i scentifichi ? Ùn si pò micca spiegà d’una manu, davanti à u Parlamentu francese, l’evuluzione di l’usu di e mascare per via di l’evuluzione di a duttrina scentifica, è da l’altra, spazzà e dumande internaziunale, ripetute è chjare di i scentifichi, moltu più quandu ellu si tratta di a salute di i zitelli. In quantu à i discorsi nant’à l’inugualità sculare è suciale, quandu omu cunosce a piazza di a Francia in fondu à a classifica di l’OCDE, ùn li possu crede tutti. Ci vulia à pensà ci à pena nanzu, chì sti prublemi esistenu dipoi anni è anni. 

A pusizione chè n’avemu da piglià oghje, l’averete capita, ùn hà nunda à chì vede cù l’ideulugia. Ùn si tratta mancu  di oppone si à Parigi. Si tratta di sapè s’è l’eletti di a Corsica sò capaci à piglià decisione, s’elli sò ghjunti à esse maiò, à affirmà si in u solu sensu di l’interessi di a Corsica è di prutege i Corsi.  

A ringrazià vi.