Curetivi bè !
Aministra di a Saluta, Geneviève Darrieussecq, hà annunziatu issu 18 di nuvembri davanti à u Senatu chì i medicini sariani menu rimbursati l’annu chìveni. U nivellu di rimbursamentu di issi medicini da a Securità suciali calarà di 5 % in u 2025, mentri ch’ellu sarà dinò u casu pà a presa in carica di i cunsultazioni medicali. Più cà mai, mentri ch’ellu si tratta di u famosu bughjettu 2025 di a Francia, u scopu hè di fà u più ecunumii pussibuli. Issa situazioni inghjinnarà un trasferimentu versu i cumplementarii saluta. In più di quissa, par ecunumizà in tuttu 5 miliardi d’auri, u guvernu pensa à calà i prezzi di certi prudutti di saluta pà 1,2 miliardu, ma dinò misuri d’efficacità à l’uspidali pà 600 milioni è ancu nant’à i curi in cità pà a listessa somma. A ministra di a Saluta hà accertatu dinò chì i spesi di medicini quist’annu sò stati smisurati. U guvernu prova à limità l’affari dopu à un dialogu incù l’industriali pà truvà meccanisimi di cumpensazioni. Dighjà, nant’à i reti suciali, a zerga hè tamanta. Certi ammentani dighjà una crescita di i cuti-
zazioni pà i mutuali, ci n’hè altri chì pensani ancu à ùn circà più à curassi s’elli ùn ani più i mezi di pagà. A Francia n’hè veramenti ghjunta à un puntu criticu. Bella sicura, a so situazioni finanziaria si pudaria apparagunà à quilla di a Grecia calchì annu fà. Ma vulè fà ecunumii nant’à a saluta di u so populu hè una scelta veramenti pessima. Senza vulè ghjucà à l’anarchichi di sirviziu, si pudaria andà à circà i soldi in altrò. Ùn fussi cà nant’à tutti issi grandi gruppi chì u Statu hà sustinutu è chì oghji cercani à lampà fora una mansa di parsoni, fendu tema un disimpiegu tamantu. O ancu fendu vultà l’impositu nant’à a furtuna. Ùn sarà micca què chì farà scappà i più ricchi di u paesi. Senza dinò vulè parta da un stremu à l’altru, sò sempri i classi mezani chì risicani di ritruvassi i più casticati. No comment… Trà a saluta, a collara lighjittima di l’agricultori chì ùn volini micca mora, i funziunarii è i
parsunali di a SNCF, u vaghjimu è l’inguernu prumettini. Attenti à ciò chì pudaria nascia in carrughju quì o culà…
Santu CASANOVA
