Energia d’avvena ?

A settimana passata, a prima petra di a futura cintrali di u Ricantu hè stata posta in Aiacciu, in prisenza frà altru di a ministra di u Partenariatu cù i tarritorii è di a Dicintralizazioni, Catherine Vautrin. Un prughjettu chì ùn s’aspit tava guasgi più, vistu u ritardu di parechji anni chì hè statu pigilatu nant’à issu cartulari maestru pà l’alimentazioni in eletricità di tuttu u rughjonu aiaccinu è aldilà. Cù ottu mutori di generazioni nova, a so pruduzzioni duvaria copra à pocu pressu 20 % di a cunsumazioni annuali di l’isula. U scopu hè sicuramenti di rim piazzà « un’anzianetta » chì n’hà fattu abbastanza à tutti i nivelli, u Vaziu, chì via ghja incù u « fioul » pisivu. Pà contu soiu, a struttura di u Ricantu, cù un’intrata in sirviziu bramata da quì à u 2028, saria alimentata da un bioliquidu, un cumbus tibili d’urighjini vegetali elaburatu à partasi d’oliu di colza. S’ellu hè una bona pà l’aria ch’ellu si rispira soca è dunqua pà a nostra saluta, ùn si tratta micca quan tunqua di una suluzioni parfetta. A pruduzzioni di colza ùn hè mancu appena neutra in carbonu. Ci vularà à passà pà impurtazioni di iss’oliu pà battellu in Auropa com’ellu si faci nant’à l’isula di a Riunioni. Issa cultura pudaria cuntribuis cia à fà crescia a sfurestazioni è dunqua un scumpientu ambientali tremendu ? A dumanda pò essa posta, par asempiu pà quilli chì difindiani l’alimentazioni di a cintrali à u gaz. Infini, cù iss’attrazzu novu, a Cullettività di Corsica, à traversu a prugrammazioni pluriannuali di l’energia, conta più cà mai di ghjugna à u so scopu di transizioni è soprattuttu d’autunumia energitica di l’isula da quì à u 2050, mentri chì da quì à u 2030, l’energii di rinnovu duvarani raprisintà 75 % di l’eletricità prudutta ind’è noi. Dopu à 50 anni d’usu di u fioul pà u Vaziu è Lucciana, u Ricantu pudaria fà entra infini u nostru tarritoriu chì t’hà di più in più bisogni inde u vintunesimu seculu ? Spiremula ! 

_{Santu CASANOVA}