ㅤ
Dumenica u 15 di dicembri di u 2024. Hè podassi a prima volta dipoi un bellu pezzu ind’è noi chì l’aghjettivu « storicu » hè statu adupratu cù ghjustezza è misura. Qual’hè chì avaria pussutu creda veramenti chì un Papa in eserciziu vinaria in Corsica un bellu ghjornu ? In più di duimila anni di cristianità, ùn era mai accadutu pà a nostra isuluccia. C’hè vulsutu à aspittà a vulintà è a ditarminazioni di u nostru vescu è cardinali, François Xavier Bustillo, pà veda issu sognu divintà riali. In menu d’un mesi, u viscuvatu, ma dinò i sirvizii di u Statu, di a cità d’Aiacciu è di a Cullittività di Corsica si sò mossi d’una manera strasurdinaria pà urganizà un evenimentu di purtata mundiali : l’accolta di u Papa Francescu. È si pò dì senza dubbitu ch’ella hè stata una riescita tamanta. Sò millai è millai d’Aiaccini, è di Cor si di manera generali, di tutti i generazioni, chì sò ghjunti pà pruvà à avvicinassi u più pussibuli da u Santu Padre, chì avarà binidittu nant’à a so strada una mansa di zitelli. Hà ancu ricunnisciutu ch’ella era a prima volta ch’ellu ni vidia tantu, ciò chì l’hà cummossu assai. U populu corsu hè statu à l’altezza di issa stonda sto rica, ch’ella sighi pà a so prisenza massiccia in carrughju, cà pà a so pietà è u so rispettu frà altru duranti a messa giganti chì s’hè tinuta à u Casone. Francescu hà incalcatu dinò nant’à i tradizioni forti di i Corsi, chì ci voli à mantena senza sfiatà, ma sempri cù un spiritu umanu, di sulidarità è d’apartura versu l’altri, è micca cù una vulintà d’isulassi o di scluda. U Santu Padre s’hè ancu resu contu di l’impur tanza di i nostri cunfraterni, leia vera trà u sacru è u prufanu, u mondu rilighjosu è a sucità civili. Ch’ella sighi in Aiacciu in i lochi induv’ellu hè statu u Papa, o puru davanti à a so televisiò o ascultendu a radiu, sò belli numarosi quilli chì t’ani cus cenza d’avè campatu una stonda fora di tempu è chì firmarà stampata ind’i libri di storia. C’hè da spirà oramai chì i ghjesgi s’ani da empia guasgi di listessa ma nera ogni dumenica in tutta a Corsica grazia à issu viaghju papali chì avarà fattu nascia o rinvivì a fedi di certi, ma dinò chì issu mumentu d’una forza tremenda avissi appaciatu ogni cori è ogni anima di issu paesi chì campa, à modu soiu, a so laicità, com’è in nisun altru locu in Francia.
Santu CASANOVA
