ㅤ
A corti amministrativa d’appellu di Marseglia hà accertatu calchì ghjornu fà a dicisioni di u tribunali amministrativu di Bastia di marzu di u 2023 chì avia annullatu i rigulamenti interni di l’Assemblea di Corsica. Nentru, ci si pudia leghja chì i lingui di i dibattiti è di i travagli sò u corsu è u francesi. Hè l’anzianu prifettu Pascal Lelarge – tamanta surpresa – chì avia intruduttu un ricorsu, ghjudichendu chì i rifarenzi à a nuzioni di « populu corsu » è dunqua à a lingua andavani contr’à a Custituzioni, postu chì sicondu u so famosu articulu 2, « a lingua di a Republica hè u francesi ». Una dicisioni chì ùn hè mancu appena piaciuta à u presidenti di l’Esecutivu, Gilles Simeoni, è à a presidenti di l’Assemblea di Corsica, Marie Antoi-nette Maupertuis, chì contani di cuntistà st’argumentariu davanti à i ghjuridiz-zioni aurupei è internaziunali. Un affari chì parmetti d’incalcà nant’à a nicissità di sbuccà u più prestu pussibuli nant’à una revisioni custituziunali chì dessi un statutu d’ufficialità à a lingua corsa. Dopu à què, parechji blucchimi di licei sò stati urganizati, ma dinò mubilizazioni liceani è studientini in carrughju, certi volti cù cunfronti viulenti trà ghjovani è forzi di l’ordini, par asempiu in Aiacciu luni scorsu. In issu cuntestu, l’autorità, ch’ellu sighi u prifettu di Corsica o ancu u merri di a Cità imperiali, ani dumandatu un ritornu à u calmu. Di manera menu abituali, u lis-tessu missaghju hè statu passatu da u nostru vescu, u cardinali François Bustillo. Una chjama à a paci nanzi à a ghjunta cusì aspittata di u papa Francescu nant’à a nostra isula. Soca a ghjesgia t’hà a paura chì, di pettu à issu tristu spittaculu, a So Santità ùn vulissi più visitacci pà raghjoni di securità. Mi diciareti, s’ella duvia fiascà issa visita, farissi piacè à u Presidenti di a Republica, Emmanuel Macron, chì faci sempri u musu pestu par via di l’assenza di u papa pà a riapartura issa dumenicata di a catedrali Notre Dame in Parighji. Ci hà da vulè ch’ellu si cuntin-tessi di Vianney è di Clara Luciani. Infini, pà vultà à a lingua corsa, podassi ch’elli ci sò altri mezi cà di mandà zitelli « à a guerra », è chì, pà a maiò parti, ùn avarani mai cacciatu una parolla di corsu da a so bocca.
Santu CASANOVA
