MUSICA
Sò più di quarant’anni ch’elli facini risunà i so voci Ghjuvan Francescu è Alanu Ber nardini incù I Muvrini. Dopu à i best-of E più belle in l’anni ottanta è A strada in u 2000, u gruppu veni di publicanni un antru u 22 di nuvembri, Avà e preferite. Una manera di lampà un’uchjata nant’à un universu artisticu da scopra pà a prima volta o da scopra torna, pà ringrazià i millai di parsoni chì ogni sera dipoi dicennii s’aduniscini in Corsica, in Francia è in Auropa, è pà cilibrà d’una certa manera tuttu u travagliu di issa squa dra di cantadori è di musicanti, è simpliciamenti u dirittu di cantà in corsu è in libertà. Issu « megliu » d’I Muvrini hè una scelta di trentun tituli, spartuti nant’à dui dischetti : u prima cù sedici canzoni chì vani da u 2002 (l’album Umani) sin’à u 2022 (Più Forti) è u sicondu di quin dici pisti, frà i quali tredici di i so più belli duetti cù altri artisti è dui pezzi inediti. Com’è prima duettu, I Muvrini ani sceltu unu di quilli chì hà apartu a strada à tutti l’altri, incù Véronique Sanson nant’à a canzona Le temps est assassin, arrighjistratu in u 1994 nant’à a scena di i Francofolies di La Rochelle. Era impussibuli dinò d’ùn metta micca a cullaburazioni mitica di i fratelli Bernardini incù l’Inglesi Sting nant’à Terre d’Oru (Fields of Gold), chì parechji millai di furtunati ani pussutu campà in vivu l’ultimu istati duranti a ghjunta in Aiacciu à l’Aiò Festival nant’à a piazza di u Casone di l’anzianu cantadori di The Police. A lingua corsa chì s’intrec cia d’una manera maravigliosa cù u francesi, l’inglesi o puru altri lingui, hè a sfida maestra riisciuta da I Muvrini à traversu issi stondi di spartera musicali, tali imbasciatori chì portani sempri in altu aldilà di i nostri fruntieri a nostra bandera. Un segnu di bona saluta culturali, chì hà parmissu d’apra orizonti novi di pettu à tutti quilli spiriti ristretti chì pinsavani chì i Corsi ùn pudiani cantà cà incù i Corsi è pà i Corsi. Si pò mintuvà i so passi cù frà altru Luz Casal, Tina Arena (À voce rivolta), Thomas Dutronc (Bonafurtuna), Grand Corps Malade (Una terranova), Stéphane Eicher (Un sognu pè campà), Mc Solaar (Jalalabad), les Polyphonies Hébraïques o ancu i 500 Choristes. Di modu generali, Ghjuvan Francescu è Alanu Bernardini ani custituitu cù a so squadra un listinu di canzoni chì pudissi currisponda à u sonu oghjincu d’I Muvrini, da chì chjappà l’arechji di i nostri tempi chì cambiani, ancu in Corsica, frà altru quilli di i ghjo vani, pà pruvà dinò à purtalli ver di a lingua corsa. Hè in issu spiritu quì ch’è no ritruvemi, à a fini di u sicondu dischettu, dui pezzi novi, Grana è L’inguernu si ne more. U prima ci invita à ritruvà un accordu cù a nostra natura umana, a nostra sucità è u nostru mondu. U sicondu, induv’elli si sentini i cori di i culleghjanti di l’insemi E Stelle di Biguglia purtati da a so prufis sora Emmanuelle Mariini, ci rimetti à u centru d’una pianetta chì brusgia. Puru s’è no t’avemi un debbitu eculogicu maiò, ùn hè micca troppu tardi pà pisà u capu è agiscia à prò di a causa a più urghjenti chì sighi. Cù Avà e preferite, ci pudimu renda contu di u viaghju tamantu chì hè statu fattu da I Muvrini dipoi a fini di l’anni sittanta è chì ùn hè micca prontu di compiasi. Un ghjiru maiò di a Belgica è di l’Olanda sarà urganizatu da u 31 di ghjinnaghju sin’à u 23 di far raghju di u 2025, mentri ch’ella hè privista dinò da quì à u veranu l’isciuta d’un dischettu novu novu. À tempu, Ghjuvan Francescu Bernardini cuntinueghja a so opara à prò di a non viulenza, andendu, com’ellu a faci dipoi parechji anni, inde i scoli, i culleghji, i prighjoni è i clubs spurtivi in tutta l’Auropa pà purtà a so parolla. Una missioni di pellegrini di a paci chì faci prò à i cori, à i menti è à l’animi, com’è i so canzoni d’arimani, d’oghji è di dumani…
L’APPUNTAMENTI DI SANTU CASANOVA
