Habemus papam ?
Avuciata corri dipoi parechji ghjorni oramai : u Papa Francescu pudaria vena in Aiacciu u 14 è u 15 di dicembri. Assistaria à un cullocchiu nant’à a rilighjosità pupulari in u Mediterraniu, à l’iniziativa di u vescu di Corsica è cardinali François Bustillo, à fiancu à parechji veschi è cardinali. Si parla dighjà di un’accolta fatta da u Presidenti di a Republica, Emmanuel Macron, o ancu d’una messa cù millai di parsoni à u Casone. Un evenimentu storicu pà a nostra isula, à tal puntu chì, ancu s’è issa visita ùn hè mancu stata ufficializata, l’alberghi aiaccini sò dighjà tutti cumpletti pà quilla dumenicata. Da chì fà piglià cuscenza di l’attesa tamanta chì trapassa i cunfini isulani o puru francesi. Torna una volta, s’ellu ci voli à aduprà u cundiziunali, a Ghjesgia di Corsica travagliaria cù l’autorità dipoi un mumentu nant’à l’urganizazioni di st’evenimentu. Ci voli à dì chì, in tarmini di lugistica, riceva un Papa in eserciziu ùn raprisenta micca nulla, ùn fussi cà à u nivellu di a securità. Basta à rammintassi u spiazzamentu di Francescu in Marseglia di sittembri 2023. S’ella si faci, c’hè da scumetta chì a cità d’Aiacciu sarà cumplettamenti chjosa duranti dui ghjorni da tuttu u restu di l’isula è a vita di i so abitanti cumplettamenti disturbata. Sicondu certi fonti, si senti dinò chì issa vinuta pussibuli di u Papa in Corsica ùn faria tantu piacè à Emmanuel Macron. U Presidenti di a Republica avaria fattu tuttu pà cunvincialu di vena in Parighji una settimana nanzi à i dati annunziati pà Aiacciu, à l’uccasioni di a riapartura à u publicu è à u cultu di a catedrali di Notre Dame. Francescu avaria ricusatu è fattu a scelta d’una tarra di più vicin’à u Vaticanu. Da chì fà nascia parechji tinsioni da u latu di l’Elysée, chì vulia marcà u colpu di a più bella manera pà una stonda parighjina ch’ella hà dicisu d’impatrunisciasi. Pà vultà à a Corsica, issa ghjunta aspittata deci ghjorni nanzi à Natali pudaria mandà un segnu di paci è di fratillanza, ma dinò un missaghju carcu à universalità. Da chì empia torna i ghjesgi corsi tuttu l’annu è micca solu pà calchì evenimentu?
Santu CASANOVA
