ㅤ
Dumenica scorsa, ghjornu di l’Immaculata Cuncizzioni è di a Festa di a Nazioni, c’hè statu un attentatu nant’à a cumuna d’Ulmetu. Una casa hè stata cum plittamenti distrutta, mentri chì u so pruprietariu è a so famighja stavani inde l’alloghju ghjustu accantu. Nant’à a facciata, ci si pò leghja parechji scrizzioni : « FLNC », « Fora », o ancu « Lingua corsa, lingua viva ». Pudaria essa un affari guas gi banali, ma mancu appena. Parchì quilli chì ani fattu st’affari, si ni sò pigliati à Corsi. A mamma di u ghjovanu babbu di famighja toccu da st’attentatu, hà fattu sapè a so tristezza è u so stumacheghju nant’à i reti suciali. Parla d’una casa mudesta distinata pà l’anni chì venini à i so figliulini, incù u so figliolu è a so moglia chì si sò indebbitati pà parechji anni, senza circà à fà qualsiasi specu lazioni immubiliari. Ammenta in u so missaghju ghjenti bestii, assassini chì ùn ani mancu circatu à rinsignassi prima di fà iss’attu tontu, cù tutta una famigliola cumplittamenti traumatizata. A donna capisci ancu menu i scrizzioni nant’à i muri di issa casa, postu ch’ella dici ch’ella hà sempri insignatu à u so figliolu, chì ellu stessu insegna à i soi i valori di u travaghju, di a famighja, l’impurtanza di difenda a nostra lingua. I zitelli sò in scola bislingua è parlani corsu, à sentala. Hà dumandatu à tutti i partiti naziunalisti corsi d’avè u curaghju è l’unestà d’uffi cializà a so pusizioni nant’à iss’attu mischinu è vigliaccu. È hè stata intesa, postu chì trè di issi partiti ani riagitu. Pà Femu a Corsica, si tratta di fatti chì inchietani, chì ùn si poni ghjustificà, nè mancu capiscia. Ind’è u Partitu di a Nazioni Corsa, chì rammenta chì a viulenza pulitica ùn hè mancu appena a suluzioni, tocca à l’assurdu quand’ella tocca figlioli di stu paesi, chì travaghjani è campani nant’à a so tarra. Infini, pà Core in Fronte, « Par quiddi chì ùn la sani micca, a famidda Lucchinacci hè una famidda paisana duva parechji di i soi sò impignati par i dritti di u populu corsu. Un tal’attentatu ùn pò chè intarrugà tutti quiddi chì, incù stintu patriotticu, lottani sempri par l’avvena di u nosciu paesu. » Si ricunnosci di menu in menu a nostra Cursichella…
Santu CASANOVA
